અપડેટ:
મહેસાણા શહેરમાં આગ લાગવાની એક ઘટના સામે આવી છે. મહેસાણા મહાનગરપાલિકા વિસ્તારમાં આવેલા પાંચ ખેતરોમાં કચરાના ઢગલામાં અચાનક આગ ફાટી નીકળતાં આસપાસના વિસ્તારમાં દોડધામ મચી ગઈ હતી.
ઘટનાની જાણ થતાં જ મહેસાણા ફાયર વિભાગની ટીમ તાત્કાલિક સ્થળ પર પહોંચી હતી. ખેતરોમાં મોટી માત્રામાં કચરો એકઠો હોવાથી આગ ઝડપથી ફેલાઈ રહી હતી. જેના કારણે આગને કાબૂમાં લેવી ફાયર વિભાગ માટે પડકારજનક બની હતી.
ફાયર વિભાગના જવાનોએ પાણીનો સતત મારો ચલાવી આગને વધુ ફેલાતી અટકાવવાના પ્રયાસો કર્યા હતા. લગભગ એક કલાકની ભારે જહેમત બાદ ફાયર ટીમે આગ પર સંપૂર્ણ કાબૂ મેળવ્યો હતો.
આ ઘટનામાં સદનસીબે કોઈ જાનહાનિના સમાચાર સામે આવ્યા નથી. સમયસર ફાયર વિભાગની ટીમ પહોંચી જતાં મોટી દુર્ઘટના ટળી હતી.
શહેરના રહેણાક અને ખેતીના વિસ્તારોમાં કચરાનો યોગ્ય નિકાલ ન થવાથી આવી આગની ઘટનાઓનું જોખમ ઊભું થઈ શકે છે. ત્યારે જાહેર સ્થળોએ કચરાના ઢગલાનું યોગ્ય વ્યવસ્થાપન થાય તે જરૂરી છે.
